الزعيم على فراش الموت
إلتفت الأسرة حول فراش الزعيم وهو يلفظ أنفاسه الأخيرة .... قال الزعيم بصوت ضعيف ولكنه
حازم فى نفس الوقت .
حسـنــى : كلكم موجودين ؟
سـوزان : أيوة يا حسنى ... أنا جنبك أهو ... وأدى جمال وعلاء .
حســــى : طيب إسمعوا اللى هقوله كويس .
جـــمال : سامعينك يا بابا ... إتكلم .
حسنـى : مصر ديه كنز يا ولاد ... إمسكوا فيها بإيديكم وسنانكم ... بنسرق فيها بقالنا سنين وسنين ولسه بتدينا .
عـــلاء : هى ديه البركة اللى بيقولوا عليها يا بابا .
حسنـى : أيوة يا ابنى ... ربنا يبارك لكم ولعيالكم فيها ... ودلوقتى إسمعونى .
عـــلاء : إنت على الهوا يا بابا ... إتكلم .
حسنـى : أنا مش مديون لحد يا ولاد ... يعنى أى واحد يصيع عليكم ويقول لكم أبوكم كان مستلف منى فلوس تفوا فى وشه على طول .
عـــلاء : إطمن يا بابا ... حرامى على حرامى ميلعبش .
حسنـى : أنا سيبت لكم يا ولاد اللى يكفيكم إنتوا وعيالكم وعيال عيالكم وتفيض ... فلوس متلتلة متتعدش ... مش هقول لكم حافظوا عليها وبس ... لآلآلآلآ ... زودوها كمان لجل ما روحى ترتاح فى تربتى .
جمـــال : هيا الفلوس اللى إنت عملتها يا بابا ديه بتسميها فلوس ... شفنى أنا وعلاء هنعمل أيه ... ولا صحيح هتشوفنا إزاى ... عموماً متقلقش .
حسنى : ودلوقتى إسمعوا وصيتى ... الحكم لأولاد مبارك ... لازم أول ما جمال يحلف اليمين تغيروا إسم مصر وترجعوه زى ما كان زمان أيام الملك فارق والملكة نازلى ( المملكة المصرية ) .
جـمـال : مفهوم يا بابا ... خش فى اللى بعده .
حسنى : الجيش والشرطة والأزهر ... أوعوا واحد من التلاتة دول يخرج عن طوعكم أبداً .
عـلاء : مفهوم برده ... اللى بعده ... يا ساتر ده إنت ممل .
سوزان : عيب يا علاء لما تكلم أبوك كده .
عــلاء : بهزر يا ماما .
حسنى : الهرم لأم العيال ... ليكى يا سوزان بعد ما خدمتينى بتفانى وإخلاص طول السنين ديه .
سوزان : هرم !!!!؟ ... هيا ديه أخرة صبرى !!!!؟ ... وده يسوى كام؟ .
علاء وهو يمسك بالألة الحاسبة : يسوى كتير يا ماما ... لو تحبى أتصرف لك فيه ممكن يعمل معاكى مبلغ كويس .
سوزان : مش هرضى بأقل من التلات أهرامات وأبو الهول .
حسنــى : مش خسارة فيكى يا غالية ... أثار النوبة لعلاء ... والأقصر لجمال ... ودلوقتى نيجى للمية ... الساحل الشمالى لعلاء والبحر الأحمر لجمال وقناة السويس تخصصوا دخلها صدقة جارية على روحى .
سوزان : إنت أكيد مخبول ... مليار ونص دولار صدقة جارية على روحك !!!! .
جـمـــال : متخديش على كلامه يا ماما ... ده يبقى كتير لو طلعنا على روحه 100 او 200 جنيه للفقرا .
علاء وهو يمسك بالألة الحاسبة : ممكن نطلع لحد ألف جنيه يا جمال ... السيولة تسمح .
حسنـــــى : أوعوا تفرطوا فى حبيب العادلى من بعدى يا ولاد ... حبيب قلبه ميت وإيده طرشه ... وهو ده اللى ينفع مع الغجر اللى هنا .
جــــــمال : بس مش بيعجبنى شنبه يا بابا .
حسنــــى: وإنت مالك ومال أم شنبه ... إحنا بنشترى مجرم .
جــــــمال : أعاهدك يا بابا إنى هخليه معايا ومش هفرط فيه أبداً .
حسنــــى : الشيخ طنطاوى يا ولاد راجل بركة ... يمين يمين شمال شمال ... أوعوا تفرطوا فيه ... بس متخلهوش يصلى عليا لأنى بصراحة مش متأكد إن كان ربنا هيتقبل منه ولا لأ .
عـــــلاء : ولا يهمك يا بابا ... هخلى أنكل كمال الشاذلى يصلى عليك .
حسنــــى : والله لو عملتها يا علاء لكون متبرى منك إلى يوم الدين .
عـــــلاء : بهزر معاك يا بابا ... أنكل كمال مش حافظ الفاتحة .
حسنـــى : المشير طنطاوى يا ولاد ... مش هوصيكم عليه ... الراجل ده عامل زى الست المستحية ... حاطط وشه فى الأرض على طول وعمره ما استجرى يرفع عينه فيا ... وفى نفس الوقت ماسك الجيش بإيد من حديد .
سـوزان : هو فعلاً خجول وكل ما يشوفنى ميقوليش غير يا ست هانم ... إبقى خليه معاك يا جمال .
جـــــمال : حاضر يا ماما .
حسنـــى : عايز جنازتى يا ولاد الناس تحكى وتتحاكى ... هاتوا المخرج الإيطالى ده اللى اسمه مكافيللى يصورها .
علاء وهو يمسك بالألة الحاسبة : هو هيكلفنا كتير ... لكن ممكن فى الأخر نلم مبلغ معقول لو خلينا شركة أجنية تحتكر حق توزيع الفيديو فى أوروبا وأمريكا .
حسنــى : عايز أحلى مدفع يشيل النعش يا ولاد .
جــــمال : مدفع رشاش .
سوزان : الهزار مش فى الحاجات ديه يا جمال .
جــــمال : أسف يا ماما .
حسنــى : عايز أدفن فى شرم الشيخ يا ولاد جنب أولمرت وشارون .
عــــلاء : بلاش كفر مصيلحه يعنى ؟
حسنــى : لألألأ ... كلها براغيت يا علاء ... وكمان إسم شرم الشيخ أشيك بكتير .
جــــمال : حاضر يا بابا ... هنفذ وصيتك بالكامل ... بس أنت الحق وقتك وأتكل بقا .
سوزان : جمال عيب الكلام ده ... لحسن بابا يغضب عليك ويحرمك من المراث .
جــــمال : لآلآلآلآ ... ربنا يخليك ليا يا بابا ويطول فى عمرك .
السبت 16 أغسطس 2008 - 17:00
